Luke 8

Nyabyei Nabari

1Esa to ɓei shan mwan Yesu wa laɓa n Galili a zhi woi gna ɓa Shekwoyi bemi ɓeɓe ɓo. Wo ɓei gni sun n wo abarai awo cei ba. 2Anyikwoza ho ɓei nyi ce n woɓei knu alijenuya n ɓa kwo kwa n wo ɓei ka ɓa gna nyi Maryamu Magadaliya ɓo nyi (Yesu ɓo la alijenu knaya nwo ngu tnaba) 3Yuwannan Chuza nyikwo ɓo nyi ce (Chuza ɓei zhin Hiridus manaja nu woi dna esu puwa wye.) Susana ɓei nyi n nazai mwa nɓa ɓo zhin ɓai ga Yesu nyaho ntuge kwa bma wo zhin (ngye a gyiwye.)

4Nwyihoi Yesu wa ga aza misali ye n ɓa ɓei cei pma ɓa wo owo ɓeda nyi.

5Ozaho ɓei nyi wa lo ofwa ntuge wo bye anya. Sanu n wo ɓei lo adoho ɓa kaya zhi n zokwo, akpe ɓa pita, alu ɓa Ba ku ɓa gyi. 6A doho ɓa kaya zhi n kni ho amma ekni yi ɓo na kutayi. Sanu nkwo ɓei la pa kwa ku fi gama ekni to ɓei nyi daidai m. 7Adoho ɓa kayafi n a knawuyi, sanu n ɓa ɓei pa aknawuyi ɓa ɓa gyice. 8Amma adoho ɓa kayazhin n kni manayi. Nyabye ye ɓo pa kwa zhin ampanyi sosai. (Sanu nwo ɓei da misali ye wa cige), “Oza n wo n tnubuaʼi lo, to sai wa wo.”

9Owo abara ɓa nya wo misali yi awyega ɓo.

10Wa cige, “Shekwoyi la ga fye n tuge fya kpe kwo awyega ye, gama ɓa zhin ɓa wu nya n mwa n Shekwoyi ebe mi tukwo. Amma azeye n ɓa zhi n mwa nyi ɓawo lo, amma ɓata gane lo m, ngye shi anabi sapai nya ɓei da nyi.

11“Okwo awyega nu nyi. Nyabye yi kwo nu zhin Shekwoyi ɓeda n aza ba. 12Zokwo yi n nyabye ho ɓei kaya zhin nyi abugba kalada nu. Sanu ɓa wo Shekwoyi ɓeda Shetan zhin wa ɓe wa kukoya to wa ye ge ɓa ga gaiciya m. 13Ekni akuta nya wu ngye aza nu, n ɓa wo Shekwoyi ɓeda amma ko ta bwa amizhi ba m. Ɓa kpelo ge ɓedayi zhin gaiciya nu har ɓa zhin ngye ɓa ga gaiciya sa fyewyi. Amma sanu n wahala ɓe, sai ɓa ta Shekwoyi zokwo ya.

14“Ado n ɓa kayafi n aknawuyi nyi, ko wu ngye aza nu nɓa wo har ɓaku gaiciya ga. Amma n navun anyiʼa wyeda zhin kwa ɓa gna-gna. Ntuce nu ɓa ta mi ɓa bma zado zhin ntuge wa vi nabari manayi m. 15Amma ekni manayi wu ngye aza abugba manayi da nu. Ɓa zhin ɓa wo Shekwoyi ɓeda ɓa nyimako sosai har ɓa lo azado ncei, ntuge ɓa ka gaiciya ga ce.”

16“Dna n saho Yesu wa nya ge) Nyikado shin za gye n wo dna fitila na wa kwo dna n Shakunʼa? Ai a zhin a tu fitila n aba kwo ɓa ga buzangna nu. Ata zhin a sokwo dna m. 17Deye kwa wuge nwyihoi aɓo kpe zaho-zahoi asiri ya a ɓei kun kwo wu nbmi sarai.

18“Ntucenu fye zhin peceiye shi fye wolo, gama oza n wo cei lo, aɓa gawo. Amma oza nwo to cei lo m, ko odo n wo gye ge wo cei lo nyi ma, aɓei la kwo gwo wo.”

19Nwyihoi, sanu n Yesu ʼya ɓedo n wa mado yi ɓei ɓe ntuge ɓa gye wo, to ɓa mi ɓa lofi nu aba n wo ɓei dna nyi m, ntuge aza ɓo zhi n mwa. 20Sanu wo ɓei wo ge ɓa zhin lo n bmi, nge ɓa cei pma ɓa gye wo. 21Wa cige, “Aza n ɓa wo Shekwoyi ɓeda ɓai zhin ko njesun, oɓanu zhin ʼmiya n mi amado yi, njesun.”

Nuwan N Esei Ɓa Vi Yesu Ɓeda

22Nwyihoi n jesun Sanu Yesu n wa barai ɓo fi n oya, wa gna ɓa ge ɓa piya ntuge ɓa lo okma deyi. 23Sanu n ɓa ɓei lo wa yashi ntuge wa wan egye kafin ɓa si. Sanu n wo ɓei wan gye aseʼa ci har ɓa ku lo wahala sosai, gama ko ɓo ce fyewyi oya kwa cekun.

24Balo n pye ɓa kun Yesu agyewyi ya, ɓa cige “Dagayi! Dagayi, ai yi ye ya bwi nuwan nu.” Nsayi wa daɓo n ese yi wa cige, Ese lafa ciɓo lonu. Nsayi-sayi kwa fa. 25Nsayi wa ci wa bara ge, “Migye fye gaiciya? Ceʼa wo ɓa sosai har ɓa cige, Nyikado nu zeye yi har ese koi wo owo ɓeda?”

26Ɓa ku si ekma deyi. Gadarin kni nu ɓei nkoi, ai la pi Galili nuwan ya. 27Sanu Yesu ɓo gmiɓe n oya ozaho n alijenu ɓei la dami woi wa ɓe Yesu aba. Wo to ɓei njei kpe m. Avingwo nu ɓei zhin wo puwa. 28Sanu wo ɓei gye Yesu, wa ɓewyi nmwa, wa miyazhi n kni wa cige, “Ho ye ma zhin kni nu, Yesu Shekwoyi nugun duduyi? Suku-suku, to ga mi wahala m.”

29Gama Yesu ɓei ku gna alijenu yi nge ɓa kun ya nwo. Alijenu yi ɓo ku nuwo sosai. Har ma wo ɓei zhin wa agma gbeya, a ye a pawo n cei wa lo zhabui dna n ɓa iko. 30Yesu wa nya alijenu yi ge, “A yi ho gena?” Ɓa ci ge, “Begye da” gama ɓa ɓei mwa begye. Ɓa ɓei fi n wo nlo dubu har ma n duya. 31Alijenu yi ɓei zhin ɓai ɓa Yesu nabai to wayaɓa fi n bwokun nyalo-nyalo nya m.

32A burutu ho ɓei laɓa ɓai gyi anyagyi ɓo, Alijenu yi ɓa nya Yesu ntuge ɓa lofi n na burutu yi. Yesu wa ciɓa ge ɓa lofi. 33Nsayi ɓa fa ʼzayi ɓa lofi na burutu yi. Aburutu yi kwa ɓa busi lo epe sepa ɓa kaya fi n ʼla. 34Aburutu knayi kwa ɓa busi lo ezhi ho ɓai da nabari nya wo ku zhin.

35Safyewyi aza yezhi ntuge ɓa gye nya kwa zhin, ɓa gye zayi, na kun alijenu ya nwo nyi n sasetu n ajei kpe ndna n wohin hankali. Odna wo aza n mwa. 36Aza n ɓa ɓei zhi ɓo, sanu Yesu ɓei kun alijenu ya nyi, ɓa ka za gna shi kwo ɓei zhin n wu. 37Oɓa vinya nsayi ɓa ɓa Yesu, nge wo fa oɓa yi wa lo wo nya, gama odna o ku ɓa wo n mwa. Yesu kwa wa lo dna n oya wa piya lo ekma deyi njesun.

38Oza n Yesu ɓei kun alijenu ya n wo nyi kwa wa ɓe ntuge wagnilo n iYesu yi. Amma Yesu wa ciwo ge awo.

39Yesu wa ciwo ge, “Jezelo oho puwa ho gnaɓa aɓe wo-woyi n Shekwoyi ku zhin ho nyi.” Ntuce nu wa laɓa n zhimi woi da Yesu iko ɓo.

Zafi wa je wye-wyeyi bwa

40N ekma deyi kwa aza gwo Yesu n agmadai, gama ɓa ɓo zhi ɓai pmi wo nu. 41Nsahi ozaho ai yiwo ge Yayirus, aduwa nyakun tukwoda, waɓe Yesu aba woi ɓa wo ge, wo gni api ɓe n woi. 42Gama owo ʼɓi gmanyi nyikwoza zyeyi 12 ɓei shi woi fi. Yesu wa du azaya laɓa, wo kun lo n Yayirus yi.

43– 44Sanu n ɓa ɓei lo nyikwoza ho n wo ɓei ye a kawo gna, wa ɓe wa to Yesu bwa. Gama owo aye 12 nu woi kpe ami, amma wo to ɓei bwa kagna ko shiko nyi agyiwye ɓei ku wo zo, nge wo si ashigbe. Amma sanu n wo ɓei to Yesu je bwa ami yi ɓa zan wo, n sayi-sayi.

45Yesu wa cige, “Nyikado nu a tomi bwa? To wa bwa za m. Bitrus wa ciwo ge, Dagayi ai aza Shekna ho lo n mwa.

46“Amma Yesu wa ciwo ge, aʼa oza n wa tomi bwa nyi, wa zhin kwo woi kpe nu, gama kagna iko la gmiya n mi.”

47Sanu nyikwozayi ɓei gye ɓo la kunzhi lonu, wa ɓe Yesu aba woi vin wa ce akwo-kwo shi, wa da shi kwa zhin nwu, har wa bwa kagna.

48Yesu wa ciwo ge, “Omi ɓi oho gaiciyaga la ho kagna, loho nya n laifiyai.”

49Sanu Yesu ɓoye gni woi daɓo n nyikwoyi aɓe wo n nabari ge Yayirus ʼɓi lafi. Ntucenu Yesu to shan damu nge wa ɓe m.

50Amma sanu Yesu ɓei wo lonu wa ci Yayirus ge, “To damu, Gami gaiciya kurum. Nyaho ta zhin wo m.”

51Sanu ɓa ɓei si owo puwa, to Yesu wa ye ge zaho-zahoi wa lo dna n nyakun, sai dai Bitrus n Yakubu yi n Yohanna yi, njesun n Yayirus yi ɓedo n wo nyikwo yi. 52Aza ɓo fi n mwa ɓai cibwi. Yesu wa ci ɓa ge, “Fye to zhin bwi ci m, ai wo to fi m, wo wan gye nu kurum.” 53Amma aza ɓa mawo san, gama ɓa ɓo kpe ge wola fi.

54Nsayi wa la eɓi yi nbwa wa ciwo ge, “ɓinyikwoyi lakala.” 55Nsayi-sayi wye-wyeyi kwa jezeɓe dawo. Wa lakala. Yesu wa gna ɓa ge fye gawo nyagyi wa gyi. 56Ada owo dada n wo yayi sosai. Amma Yesu wa gnaɓa ge ɓato gna zaho-zahoi m. Shi kwa zhin n wu m.